AMBENO (TOP) - Ho laran tristeza no konsternasaun boot, ha'u simu notísia katak ita-nia Maun Boot, Veteranu João Tabes Oki - ho naran klandestina “Boenbuaf”, nasionalista no patriota, hakotu ona iis hodi fila ba Aman Maromak nia kadunan.
Saudozu Boenbuaf la'ós de'it funu-na'in ida. Nia nu'udar riin ida ne'ebé metin tebes iha ita-nia Rezisténsia Nasionál. Nia dedika nia-an tomak, nia brani, no nia moris tomak ba kauza sagrada Libertasaun Nasionál. Nia sakrifísiu, nia lealdade metin ba prinsípiu luta nian, no nia ezemplu haraik-an no patriotizmu sei hakerek metin iha istória Timor-Leste nian, liu-liu iha fuan no hanoin Atoni-oan sira iha Oe-Cusse Ambeno.
Notisia relevante: Oe-cusse Ambeno lakon "Boenbuaf" nasionalista ne'ebe tuba rai metin
Ita lakon Veteranu no nasionalista ida. Maibé nia legadu sei moris nafatin iha jerasaun ida-idak ne'ebé ohin loron goza liberdade ne'ebé nia ajuda manan ho raan no kosar-been.
Ho ha'u-nia naran rasik, ha'u-nia família, no Embaixada Repúblika Demokrátika Timor-Leste iha Jakarta nia naran tomak, ha'u hato'o kondolénsia kle'an no sentidu ba família boot enlutada, ba Veteranu sira hotu, no ba maun-alin, inan-feton sira iha Oe-Cusse/Ambeno tomak.
Ho solidariedade no orasaun, husu ba Maromak atu simu Saudozu Oki nia klamar hodi deskansa ho dame iha Rai ne'ebé nia luta maka'as ba.
Onra no Glória Eterna ba Saudozu Boenbuaf!
Jakarta, 9 Outubru 2026
Roberto Sarmento de Oliveira Soares
Embaixadór Extraordináriu no Plenipotensiáriu
Negosiadór-Xefe Tékniku ba Fronteira Terrestre RDTL nian
