DILI (TOP) - Governu halo ona lansamentu konstrusaun ba Biblioteka Nasionál ne’ebé planeia atu finaliza iha tinan 2027 nia klaran.
Tuir Komunikadu ba Imprensa ne’ebé The Oe-Kusi Post (TOP) asesu katak, projetu Biblioteka Nasionál iha ona diskusaun nia laran dezde 2010 no hasoru ona dezafiu oioin iha tinan hirak nia laran, inklui kestaun sira kona-ba selesaun fatin, dezenvolvimentu dezeñu, atrazu sira iha aprovizionamentu, no impaktu sira hosi pandemia COVID-19.
Liuhusi esforsu koletivu Sekretáriu Estadu Arte no Kultura (SEAC), Ministériu Obras Públikas (MOP), Ajénsia Dezenvolvimentu Nasionál (ADN), Komisaun Nasionál Aprovizionamentu (CNA), Eni JPDA 06-105 (hanesan Operador Empreza Konjunta PSC 19-10), no ANP, projetu ne’e oras ne’e avansa ona ba faze konstrusaun.
Tuir prosesu konkursu kompetitivu internasionál ne'ebé hala'o entre Outubru 2024 no Novembru 2025, CGCOC-ASUC Joint Venture maka hili nu'udar kontratór ba projetu ne'e.
Projetu ne’e sei finansia liu husi kontribuisaun konteúdu lokál husi Eni JPDA 06-105 no parseiru joint venture (Inpex Timor Sea, Ltd no Repsol Oil & Gas Australia) no husi Governu Timor-Leste liu husi SEAC.
Kontratu konstrusaun asina ona iha loron 19 fulan-Dezembru tinan 2025, no kontratór hahú atividade enjeñaria no preparasaun detallu iha inísiu tinan 2026.
Iha loron 6 fulan-Jullu tinan 2026, ANP no parte interesada sira projetu nian sei selebra lansamentu ofisiál ba faze konstrusaun Biblioteka Nasionál Timor-Leste nian, hodi marka milha ida ne'ebé signifikativu iha entrega ida hosi nasaun sira ne'ebé antisipadu liu projetu infraestrutura kulturál no edukasionál nasionál sira.
Biblioteka Nasionál hein katak sei kompleta iha fulan 18 nia laran no sei fornese rekursu ida ne'ebé dura ba jerasaun sidadaun Timoroan sira iha futuru, hodi apoia aprendizajen, prezervasaun koñesimentu, no dezenvolvimentu kulturál iha nasaun tomak.
Autoridade Nacional do Petróleo (ANP) hanesan instituisaun ida ne’ebé iha Ministériu Petróleu no Rekursu Minerais (MPRM) nia okos ne’ebé responsavel ba jestaun no regulasaun atividade petrolífera iha Timor-Leste.
Nu’udar reguladór, ANP superviziona operadór sira atu kumpre sira-nia kompromisu konteúdu lokál ne’ebé konkorda ona iha Kontratu Fahe Produsaun (PSC).
Hanesan parte ida husi ninia obrigasaun sira tuir PSC 19-10, Eni JPDA 06-105 (nu’udar operadór ba Joint Venture ba PSC 19-10 ne’ebé kompostu husi Eni JPDA 06-105, Inpex Timor Sea, Ltd no Repsol Oil & Gas Australia (JPD 06-105) Pty Limited) kompromete atu finansia Projetu Biblioteka Nasionál Timor-Leste, inisiativa ida ne’ebé ho objetivu atu fó apoiu ba peskiza, edukasaun no dezenvolvimentu kulturál iha rai-laran.
