BOBONARO (TOP) - Tékniku Ajénsia Dezenvolvimentu Nasionál, Institutu Públiku (ADN, I.P.) ne’ebé destakadu iha Munisípiu Bobonaro, hamutuk ho ekipa tékniku husi Ministériu Obras Públikas (MOP) Munisípiu Bobonaro, hala’o enkontru da-uluk ho PT. Binamitra Indosejahtera atu diskute preparasaun ba implementasaun Projetu Konstrusaun Estrada Nasionál Maliana–Cailaco–Ponte Marobo, ho naruk 26 km, iha Munisípiu Bobonaro.
Tuir informasaun ne’ebé The Oe-Kusi Post (TOP) asesu husi Pájina Ofisial ADN katak, enkontru ne’e marka etapa importante ida molok hahú servisu iha tereñu, liuliu atu asegura katak preparasaun téknika, mobilizasaun rekursu no planeamentu implementasaun projetu la'o tuir kondisaun no obrigasaun kontratuál.
Iha enkontru, partisipante sira rona aprezentasaun husi kompaña no kontratór kona-ba preparasaun atu hahú servisu. Diskusaun mós fó espasu ba parte sira atu haree aspetu importante sira ne’ebé presiza prepara molok mobilizasaun no implementasaun servisu iha terenu.
Bazeia ba informasaun iha dokumentasaun públika kona-ba prosesu tender, projetu ne’e uza referénsia TENDER/105/MOP-2025. CNA publika informasaun kona-ba reuniaun pré-bid no abertura proposta téknika ba projetu ne’e, ho deskrisaun Construction of National Road Maliana–Cailaco–Marobo Bridge (26 KM), Bobonaro Municipality.
Portal e-Procurement Timor-Leste mós lista TENDER/105/MOP-2025 iha oportunidade procurement ne’ebé relasiona ho korredór estrada Hatulia–Cailaco–Maliana (A11), 26 km, ne’ebé reforsa katak projetu ne’e tama iha prosesu kontratasaun públika nasional.
Tuir dadus fornese husi ekipa tékniku iha atividade monitorizasaun ne’e, montante kontratu projetu mak US$21,713,665.71.
Konstrusaun no melloramentu estrada Maliana–Cailaco–Marobo iha relevánsia ba konektividade iha parte oeste Timor-Leste. Sistema GIS 4 Project hosi ADN, I.P. hatudu katak korredór Maliana–Cailaco–Marobo iha ona istória implementasaun projetu reabilitasaun estrada iha vários seksaun, inklui Pakote I no Pakote II.
Dadus GIS ADN mós hatudu katak iha atualmente vários projetu infraestrutura rodoviária no proteksaun estrada/bee ne’ebé la'o iha Munisípiu Bobonaro, inklui projetu iha Cailaco. Ida-ne’e hatudu importánsia kontinua husi investimentu públiku ba infraestrutura rodoviária iha munisípiu.
Iha kontestu ne’e, estrada ne’ebé liga Maliana, Cailaco no Marobo bele iha papel importante atu hadi’a mobilidade komunidade, fasilita transporte produtu agríkola no komérsiu, no aumenta asesibilidade entre área sira iha Munisípiu Bobonaro.
Enkontru entre ADN, MOP no kontratór mós sai parte husi prosesu koordenasaun interinstitusionál atu asegura preparasaun no implementasaun projetu la'o ho responsabilidade.
Iha implementasaun projetu infraestrutura públika ho eskala boot, aspetu hanesan kumprimentu ba espesifikasaun téknika, kalendáriu servisu, kualidade material, seguransa iha fatin servisu, jestaun risku no kumprimentu obrigasaun kontratuál sai elementu importante atu monitoriza.
Ho valor kontratu ne’ebé to’o US$21.7 miliaun, monitorizasaun regular no koordenasaun entre ADN, MOP no kontratór sei importante atu garante katak investimentu públiku ne’e fó rezultadu tuir objetivu no benefísiu ba komunidade.
