AMBENO (TOP) - Rezultadu inspesaun husi Komisaun ba Anti-Korupsaun (KAK) ne’ebé hala’o iha inisiu fulan Jullu iha Rejiaun Administrativu Espesial Oe-Kusi Ambeno (RAEOA) konsege identifika kompañia TK Unipessoal, Lda abandona tiha projetu konstrusaun Pre Eskolar Quinat ho folin $95.120,53 desde tinan 2023 to’o ohin loron seidauk remata.
Tuir informasaun ne’ebé The Oe-Kusi Post (TOP) asesu husi Pájian KAK nian katak, Ministeriu Edukasaun nu’udar nain ba projeitu konstrusaun Pre Eskolar ne’e, no halo ona pagamentu 30% tuir progresu servisu fiziku iha terenu.
Iha loron Kuarta, 01 Jullu 2026, Komisariu KAK, Rui Pereira dos Santos hala’o vizita serbisu offisial iha RAEOA hala’o sorumutu ho Diretor Serbisu Regional Obras Publicas (SROP), Remigio Nuno Sila ho ninia estrutura enjineiru sira iha edifisiu SROP Pante Makassar.
Objetivu husi sorumutu ne’e, Komisariu KAK akompaña husi Espesialista Anti-Korrupsaun, Ferdinal Alves ko’alia kona-ba projeitu abandonadu no pendente sira iha RAEOA ne’ebé kompañia manan-nain projeitu sira seidauk finaliza.
Projeitus lubuk balun iha RAEOA kuaze kompañia sira implementa ho di’ak no finaliza ona, maibé sei iha projeitu 6 mak seidauk finaliza. Nune’e, Komisariu KAK hamutuk ho ekipa enjinaria KAK nian durante semana ida halo serbisu iha Ambeno hodi halo inspesaun ba projeitu pendente sira ne’e.
Durante sorumutu ho Diretor SROP, Remigio Nuno Sila, Komisariu KAK rekomenda atu emprezariu sira ne’ebé la iha kbit finanseira finaliza projeitus bele halo karta resignasaun.
Komisariu KAK rekomenda ba Diretor SROP katak, hafoin nia parte simu karta resignasaun kompañia implementador projeitu abandonadu, parte SROP ho nia tekniku sira halo konsultasaun ho parte juridiku RAEOA hodi halo fali tenderizasaun foun ba projeitu 70% restu hodi nune’e kompanha seluk bele finaliza.
“Parte SROP RAEOA bele halo fali kotasaun no RfQ foun tuir pursedimentu aprovizionamentu nian atu nune’e empresariu seluk bele kontinua obra no finaliza projeitus abandonadu sira iha RAEOA,” Katak Komisariu Rui durante sorumutu.
Hafoin sorumutu ne’e, Komisariu KAK lidera ekipa enjineiru KAK no SROP ba halo inspesaun ba projeitu abandonadu konstrusaun foun Pre Eskolar Quinat ne’ebé lokaliza iha Suku Costa Pante Makassar.
Kompanha TK Unipessoal Lda abandona projeitus ho folin $95.120,53 ne’e hahu iha loron 18 Outubru 2023 ho durasaun servisu durante tinan tolu [3] ona. Ministeriu Edukasaun nudar nain ba projeitu halo ona pagamentu 30% tuir progresu servisu fiziku iha terenu.
Komisariu KAK hamutuk ho enjineiru ba hala’o inspesaun no monitorizasaun ba projeitu abandonadu sira iha RAEOA bazeia ba Lei Nu. 8/2009 12 Jullu - kriasaun KAK no Lei Nu. 7/2020 26 de Agosto – MPCC ne’ebé refleta ba prinsípiu sira anti-korrupsaun nian hanesan responsabilidade, akuntabilidade, profesionalizmu, imparsialidade no integridade.
